८.(लघु कथन ) हार्न नचाहने मान्छे

(लघु कथन )
हार्न नचाहने मान्छे
सरण राई
उसले आफ्नो लामो जिन्दगी फर्केर हेर्यो | जितेको अनुभूति भएन | ऊ सधै हारेको रहेछ | पेट पाल्ने शुसेधन्दामै उसको सम्पूर्ण जीवन बितेको रहेछ |
सम्झेर निस्सार जीवन उसको मन हुडलिएर आउँछ | आँखामा आँसु आउँनुका साथै उसको मन एक तमासको हुन्छ . थाहै नपाई व्यर्थ गएको जिन्दगी सम्झेर आँसु तर्तरी झर्छ |
ऊ स्कुलमा पढ्दा कविता लेख्ने गर्थ्यो | आज अचानक उसलाई कविता फुर्छ | लेख्छ मन ,मुटु र मगजमा थुप्रिएको अनगिन्ती पीडा, व्यथा र ... के के !
कविता सुन्दर बन्छ | स्थानीय पत्रिकामा छपाउछ | असफल एउटा सङ्गीकारलाई त्यो कविता मन परेछ | निकै मिहिनत गरेर सङ्गीत भर्छ | गाउने कसले ? एउटा असफल गायकलाई त्यो गीत गाउँन लगाउछ |
गीत 'सुपरहिट ' हुन्छ | सुन्नेहरु कोहि क्वाँक्वाँ रुन्छन भने कोहि अत्यन्त प्रसन्न भएर मुस्कुराउँछन् | कस्तो अचम्भको गीत ! सबको मन र मुटु छुन सफल हुन्छ | सबै त्यो गीत गुन्गुनाउन मन पराउछन् |
त्यो एउटै कविता-गीतले तीनजना हार्न लागेका मान्छेहरुलाई हार्न दिदैंन | उनीहरु त्यो एउटै कविता-गीत जीवन्त रहुन्जेल बाँचिरहेका हुनेछन् |
ऊ असाध्य बिरामी भएको खबर सुनेर संगीतकार र गायक उसलाई भेट्न जान्छन् | उनीहरु कविको उपचारको लागि जति पनि खर्च गर्न तयार थिए | तर ऊ मान्दैन , भन्छ -- " बरु त्यहि गीत मलाई सुनाउनुहोस , म सुन्दै मर्न चाहन्छु | " गीत सुन्दै उनी बिते |
हार्न नचाहने मान्छे आफ्नो कृति र असल कामले सदैव जीवित रहन्छ | ऊ बिजेता बन्छ |
२०७१ फागुन ६ ,

इन्द्रबहादुर राई  र सरण राई